Jæja, þá er fyrsta skíðaferð ársins afstaðin! (reyndar fyrsta skíðaferðin í 12 ár en það er önnur saga!!). Ég fór ásamt 20 skólafélögum til Maine á skíði um helgina og planið að gista og skíða í Sunday River í tvo daga. Ég fór ásamt Kamönu og Akki á föstudagskvöldinu og við náðum á þjónustumiðstöðina til að ná í lyklana að íbúðinni rétt fyrir miðnætti. Ferðin til Maine tekur ca 4 tíma og til að komast þangað þarf að keyra í gegnum New Hampshire þannig að ég heimsótti tvö ný fylki núna um helgina... veivei.. Okkur tókst þó að villast þrisvar sinnum á leiðinni. Í fyrstu tvö skiptin sáum við löggur sem aðstoðuðu okkur og í þriðja skiptið römbuðum við á starfsmann Sunday River sem var einmitt staðurinn sem við vorum að fara á. Lucky us:) Við vorum samt með GPS tæki þannig að ég skil eiginlega ekki alveg hvernig okkur tókst að villast svona... en það gerði þetta bara skemmtilegra:)
Á laugardeginum vakti Akki okkur með ekta amerískum morgunmat, pönnukökum, eggjum, kartöflum og beikoni - veit ekki alveg hvað mér fannst um það, dáldið skrítið að borða svona steikt dæmi í morgunmat. Svo fórum við upp í brekkur - og vá! við erum að tala um svona 10x Bláfjöll að stærð. Þarna voru á bilinu 30-40 brekkur, miserfiðar þó og tugir lyftna. Svo voru veitingahús, pöbbar, kaffihús, æfingasvæði, verslanir etc etc... algjört mekka fyrir skíðamanninn!! Fyrsta ferðin okkar upp með lyftu gekk dáldið brösulega fyrir sig - sér í lagi þar sem þetta var fyrsta skíðaferð Akki og Kamönu. Við fundum þarna græn merkta stólalyftu (grænn = auðveldustu brekkurnar en samt ekki barnabrekkurnar). Í fyrsta lagi náði Kamana ekki að setjast í stólinn heldur flækti skíðað í einhverjum staur sem var þarna þannig að það það þurfti að stoppa lyftuna og hjálpa henni. Þegar skíðið var komið á réttann stað var haldið upp og vá! ótrúlega flott svæðið þarna og ég veit ekki hversu marga km (ok metra!!) við fórum með lyftunni upp... svo þegar kom að því að fara úr stólnum galar Akki: Oh boy, I don´t know how to get off this thing! og ég hló svo mikið að ég datt sjálf þegar ég var að renna mér úr lyftunni! og þarna lágum við þrjár þannig að aftur þurfti að stoppa lyftuna AFTUR því við blokkuðum svæðið frá lyftunni að brekkunni. Í fallinu sneri ég eitthvað upp á ökklann þannig að löppin var eitthvað aum það sem eftir var ferðar en ég reyndi þó að skíða aðeins meira. Það sem meira er, ég held ég hafi nú bara ekki gleymt neinu sem Þórir íþróttakennari kenndi mér í skíðaferðalögunum í gaggó forðum enda datt ég bara ekki neitt!! (ok, fyrir utan lyftu fallið).
Um kvöldið var svo farið á pöbb, mikil stemning en fólk samt frekar þreytt eftir daginn. Í morgun (sunnudag) ákváðum við stelpurnar bara að fara snemma og fara frekar í Wal Mart að versla heldur en að fara aftur upp í brekkur... sáum nefnilega þessa risastóru búð í Maine á leið upp á fjallið... Wal Mart fær alveg 8 af 10 mögulegum - Target er ennþá í fyrsta sæti... Keyrðum svo heim eftir alveg frábæra ferð og umfram allt var alveg rosa gott að komast aðeins í hreint fjallaloftið, minnti bara dáldið á heima...:)

Nú tekur skólinn bara aftur við, skilaverkefni, case, próf og fleira gotterí framundan.. þannig að ekki verður bloggað mikið (ekki það að ég sé eitthvað svaka dugleg við þetta! heheheeh).

HK